Зайырлылық – қоғам тұрақтылығының негізі
Қарақоңыр ауыл округіндегі Абай атындағы білім беретін жалпы орта мектебінде жоғары сынып оқушыларымен «Зайырлылық және зайырлы мемлекет: ұғымы, мәні және белгілері» тақырыбында танымдық кездесу өтті. Бұл іс-шара ақпараттық-түсіндіру тобының (АТТ) жоспарына сәйкес ұйымдастырылды.
Кездесудің басты мақсаты – оқушыларға зайырлылықтың мәнін түсіндіру, оның демократиялық қоғам қалыптастырудағы рөлін айқындау, сондай-ақ Қазақстан Республикасының зайырлы мемлекет ретіндегі ерекшеліктерін жан-жақты талқылау.
Кездесу барысында зайырлы мемлекеттің негізгі белгілері, дін мен мемлекеттің өзара қарым-қатынасы, Қазақстан Конституциясындағы зайырлылық қағидаттары туралы кеңінен айтылды. Сарапшылар мен ұстаздар оқушыларға зайырлылықтың діни сенім бостандығымен үйлесетінін, бірақ мемлекеттік басқару жүйесінде діннің араласпайтынын нақты мысалдар арқылы түсіндірді. Сонымен қатар, зайырлы қоғамда әр азаматтың құқығы мен бостандығы заңмен қорғалатыны атап өтілді.
Оқушылар кездесуге белсенді қатысып, сұрақтар қойып, өз ойларын ортаға салды. Олар зайырлылықтың адамның еркіндігі мен білім алу құқығын қамтамасыз етудегі маңызын жақсы түсінетінін көрсетті. Талқылау барысында зайырлы мемлекеттің басты құндылықтары – толеранттылық, теңдік, құқықтық тәртіп және адам құқықтарын қорғау екені ерекше аталып өтті.
Кездесу соңында қатысушылар Қазақстанның зайырлы мемлекет ретіндегі даму жолын қолдайтынын, бұл қағидат елдегі тұрақтылық пен өркендеудің кепілі екенін атап өтті. Осындай танымдық іс-шаралар жастардың құқықтық сауаттылығын арттыруға және олардың қоғамдағы белсенді азаматтық ұстанымын қалыптастыруға ықпал ететіні сөзсіз.
