"Балдәурен" бастауыш сынып оқушылары "18 наурыз – Ұлттық киім күні" мерекесін насихаттады
Ұлыстың ұлы күні – Наурыз мейрамы қарсаңында 18 наурыз елімізде "Ұлттық киім күні" ретінде аталып өтуде. Бұл күннің басты мақсаты – ұлттық құндылықтарды дәріптеу, халқымыздың сәндік-қолданбалы өнерін насихаттау және жас ұрпақтың ұлттық киімге деген қызығушылығын арттыру.
Осы орайда, "Балдәурен" бастауыш сынып оқушылары бұл мерекені ерекше атап өтті. Оқушылар қазақтың дәстүрлі киімдерін киіп, ұлттық нақыштағы сән үлгілерін паш етті. Әжелердің зерлі қамзолы, ер балалардың шапаны мен бөркі, қыздардың әсем оюланған көйлегі мектеп ауласын қазақы рухқа бөлеп, мерекелік көңіл-күй сыйлады.
Іс-шара барысында оқушылар ұлттық киімдердің тарихы мен ерекшеліктері туралы мәліметтермен бөлісіп, қазақ халқының дәстүріне қатысты қызықты деректер айтты.
Ұлттық киім – әр халықтың мәдениетінің айнасы. Біз балалардың өз тамырынан ажырамай, ұлттық рухта тәрбиеленуіне ерекше мән береміз. Осындай шаралар арқылы олардың бойында ұлттық құндылықтарға деген құрмет қалыптасады.
Бұл бастама – жас буынның қазақтың киім өнеріне деген қызығушылығын арттырып, салт-дәстүрге деген сүйіспеншілігін оятатын игі қадам. "Балдәурен" оқушыларының бұл бастамасы барша қауымға үлгі болары сөзсіз!
